Wednesday, January 27, 2010

കുബേര കുണ്ടലി ധരിച്ചാല്‍ കാശുണ്ടാകുമോ...?

രാവിലെ ബ്രേക്ക് ഫാസ്റ്റ് കഴിച്ചു കൊണ്ടിരിക്കുമ്പോള്‍ വെറുതെ ചാനലുകള്‍ മാറ്റിക്കൊണ്ടിരിക്കുകയായിരുന്നു . മലയാളത്തിലെ പ്രശസ്തമായ ഒരു ആദ്യകാല ചാനല്‍. ചില ഹിന്ദി ചാനലുകളില്‍ കാണുന്നത് പോലെയുള്ള ഒരു തരം പരസ്യം..
"നിങ്ങള്ക്ക് സാമ്പത്തിക അഭിവൃത്തി ഉണ്ടാകുന്നില്ലേ...? കുബേര മഹാരാജാവ് നിങ്ങളില്‍ പ്രസാദിച്ചില്ലേ...? നിങ്ങള്‍ കുബേര കുണ്ടലി ധരിക്കൂ..."
ഓഹോ അപ്പൊ അതാണ്‌ കാര്യം...

മുടി സ്ട്രയിട്ടന്‍ ചെയ്ത ഒരു പെണ്ണുമ്പിള്ള അടിച്ചു വിടുകയാണ്

കുബേര മഹാരാജാവിന്റെ പ്രസാദം ഉണ്ടായാല്‍ പിന്നെ നിങ്ങടെ വീട്ടില്‍ നോട്ടു മഴയായിരിക്കും പോലും...

പിന്നെ അവള്‍ കുണ്ടലി കാണിച്ചു. സാക്ഷാല്‍ കുബേര കുണ്ടലി....

ഒരു നാലിഞ്ചു നീട്ടം വരുന്ന ഒരു സാധനം... അത് പണപ്പെട്ടിക്കകത്തും പിന്നെ വീട്ടിലെ എവിടെയോ കൂടി വയ്ക്കണമെന്ന്.

കുണ്ടലി ആള് മോശം അല്ല കേട്ടോ. വില വെറും നാലായിരം രൂപ. അതൊരെണ്ണം വാങ്ങി വച്ചാല്‍ പിന്നെ കുബേര മഹാരാജാവ് അങ്ങ് പ്രസാദിക്കലോ പ്രസാദിക്കല്‍ ആയിരിക്കും.

ചൊറിഞ്ഞു കയറി വന്നത് കൊണ്ട് പെട്ടന്ന് തന്നെ ചാനല്‍ മാറ്റി.

ഓഫീസിലേക്കുള്ള വഴിയില്‍ ഇത് തന്നെയായിരുന്നു തലയില്‍... ഒരു കുണ്ടലി വാങ്ങി വീട്ടില്‍ വച്ചാല്‍ പോരെ...? എന്തിനാ ജോലിക്ക് പോകുന്നെ... കഷ്ടം തന്നെ.... നൂറു ശതമാനം സാക്ഷരത അവകാശപ്പെടുന്ന മലയാളികള്‍ക്കിടയിലേക്കും ഇത്തരം ബുള്‍ ഷിറ്റുകള്‍ വന്നു തുടങ്ങിയല്ലോ...

ധനാകര്‍ഷണ യന്ത്രം, ഇഷ്ടപെട്ട പെണ്ണിനെ ആകര്‍ഷിക്കാന്‍ യന്ത്രം.... എന്ന് വേണ്ട ലോകത്തുള്ള സകല തരികിടകള്‍ക്കും ഇപ്പോള്‍ യന്ത്രം....

നാലായിരവും അയ്യായിരവും കൊടുത്ത് ഇതൊക്കെ വാങ്ങി ഉപയോഗിക്കുന്നവരോട് ഒരു വാക്ക്...

നിങ്ങള്‍ ഇത് വാങ്ങുമ്പോള്‍ കുബേര മഹാരാജാവ് പ്രസാദിക്കുന്നതും നോട്ടു മഴ ഉണ്ടാകുന്നതും ഇതൊക്കെ വില്‍ക്കുന്നവരുടെ പണപ്പെട്ടിയില്‍ മാത്രമായിരിക്കും

ചില കൂതറ ചാനലുകള്‍ കാശുണ്ടാക്കാനായി എന്ത് പരിപാടിയും കാണിക്കുമായിരിക്കും. പക്ഷെ മലയാളത്തിലെ മുഖ്യ ധാരാ ചാനലുകള്‍ അങ്ങനെ ആവാന്‍ പാടില്ലല്ലോ. സമൂഹത്തിലെ ചില അന്ധ വിശ്വാസങ്ങളെയും മറ്റു അനാചാരങ്ങളെയും പറ്റി ആളുകളില്‍ അവെയര്‍നസ് ഉണ്ടാക്കുന്നതില്‍ മാധ്യമങ്ങള്‍ക്ക് നല്ല പങ്കുണ്ട്. അങ്ങനെ ഉള്ള മുഖ്യധാര ചാനലുകള്‍ ഇത്തരം പരിപാടികള്‍ സംപ്രേഷണം ചെയ്തു ആളുകളെ വിഡ്ഢികളാക്കാതെ സമൂഹത്തിനു ഗുണം ചെയ്യുന്ന കാര്യങ്ങള്‍ സംപ്രേഷണം ചെയ്യേണ്ടതാണ്...

പിന്നെ എത്ര വിദ്യാഭ്യാസം നേടിയാലും ചില 'വിശ്വാസങ്ങള്‍' ഉപേക്ഷിക്കാന്‍ മടിക്കുന്നവരോട് എന്ത് പറയാന്‍....

Saturday, January 2, 2010

വണ്ടിക്കാരോ വണ്ടി നിര്‍ത്തോ... എനിക്കിച്ചീച്ചി മുള്ളണം

ഇത് എനിക്ക് അത്ര ഓര്‍മയുള്ള കാര്യമല്ല. എന്റെ അമ്മ ഇടയ്ക്കിടയ്ക്ക് പറയാറുള്ളതുകൊണ്ട് ആ സംഭവം അങ്ങ് പോസ്റ്റുന്നു.

എനിക്ക് അഞ്ചോ ആറോ വയസ്സ് പ്രായമുള്ള സമയം. അമ്മ എന്നെയും കൊണ്ട് കോട്ടയത്തുള്ള ഒരു ബന്ധു വീട്ടില്‍ പോകുന്നു.

യാത്ര തുടങ്ങി കുറച്ചു കഴിഞ്ഞപ്പോഴാണ് എനിക്ക് ഒരു മാതിരി ആ പ്രായത്തിലുള്ള എല്ലാ കുട്ടികള്‍ക്കും തന്നെ ബസ് യാത്രയില്‍ തോന്നാറുള്ള ആ തോന്നല്‍ ഉണ്ടായത്. കാര്യം വളരെ സൌമ്യമായി അമ്മയോട് പറഞ്ഞു. ബസ്സിലാണെങ്കില്‍ ഒടുക്കത്തെ തിരക്കും. വളരെ സ്നേഹത്തോടെ അമ്മ പറഞ്ഞു:

"മോനെ, ഇനി ഒരു ഒന്നര മണിക്കൂര്‍ കൂടി കഴിഞ്ഞാല്‍ നമ്മള്‍ ബസ്സിറങ്ങും. അപ്പോള്‍ ആകട്ടെ."

"ഹേയ് അതൊന്നും പറഞ്ഞാല്‍ പറ്റത്തില്ല."

ഞാന്‍ പ്രശ്നം ഉണ്ടാക്കും എന്ന് തോന്നിയപ്പോള്‍ അമ്മ പറഞ്ഞു

“വണ്ടി ഇടയ്ക്ക് എവിടെയെങ്കിലും നിര്‍ത്തുമായിരിക്കും “

വണ്ടി ഇടയ്ക്കു നിര്‍ത്തിയാല്‍ കാര്യം സാധിപ്പിക്കാം എന്ന ഫോള്‍സ് പ്രോമിസ് വിശ്വസിച്ചു ഞാന്‍ ഇരുന്നു. പണ്ടാരമടങ്ങാന്‍ വണ്ടിയാണെങ്കില്‍ നിര്‍ത്തുന്നുമില്ല. ഒരു അര മണിക്കൂര്‍ കൂടി വെയിറ്റ് ചെയ്തു.

വീണ്ടും അമ്മയെ ഞോണ്ടി, ബട്ട്‌ നോ റെസ്പോണ്‍സ്

ഒരു മണിക്കൂര്‍ കൂടി കഴിഞ്ഞാല്‍ കോട്ടയം എത്തുമത്രേ. ഉണ്ണി ബ്ലാഡറിനുള്ളില്‍ ഉണ്ണി മൂത്രം അങ്ങ് തിളച്ചു മറിയുകയാണ്.

ഒരു പത്തു മിനിട്ട് കൂടി വെയിറ്റ് ചെയ്തു. ഒരു മണിക്കൂര്‍ പോയിട്ട് ഒരു മിനിട്ട് പോലും സഹിക്കാന്‍ പറ്റുന്നില്ല. പിന്നെ ഒന്നും ആലോചിച്ചില്ല. കണ്ണുകള്‍ ഇറുക്കി അടച്ചു സര്‍വ ശക്തിയും എടുത്തു ഒറ്റ അലര്‍ച്ചയായിരുന്നു.

"വണ്ടിക്കാരോ വണ്ടി നിര്‍ത്തോ... എനിക്കിച്ചീച്ചി മുള്ളണം."

എന്റെ ശബ്ദം ഡ്രൈവറുടെ ചെവിയില്‍ പതിക്കുകയും അദ്ദേഹത്തിന്‍റെ വലതുകാല്‍ ബ്രേക്കില്‍ ആഞ്ഞമരുകയും ചെയ്തത് സെക്കന്റുകള്‍ കൊണ്ടായിരുന്നു തന്റെ പിടലി വെട്ടിച്ചു ഡ്രൈവറും മറ്റു യാത്രക്കാരും തിരിഞ്ഞു നോക്കി.

ഇത്രയും ഇഫക്റ്റ് പ്രതീക്ഷിക്കാതിരുന്ന ഞാനും, പിന്നെ ഞാന്‍ ഇങ്ങനെ വിളിച്ചു കൂവുമെന്നു സ്വപ്നത്തില്‍ പോലും പ്രതീക്ഷിക്കാതിരുന്ന അമ്മയും ഒരു നിമിഷം സ്തബ്ദരായി.....

"ചെറിയ കൊച്ചല്ലേ ചേച്ചീ....എറക്കി മുള്ളിക്ക്"

ദീന ദയാലുവായ കണ്ടക്ടര്‍

എന്റെ യൂറിന്‍ ബ്ലാഡര്‍ മുത്തപ്പാ.... രക്ഷപെട്ടു.

ആളുകളുടെ ചിരികള്‍ക്കും കമന്റുകള്‍ക്കും ഇടയിലൂടെ അമ്മ എന്നെയും കൊണ്ട് പുറത്തിറങ്ങി.

ഇത്ര കമന്റടിക്കാന്‍ മാത്രം, ഇവന്മാരൊക്കെ എന്താ ബ്ലൂടൂത്ത് വഴിയാണോ യൂറിന്‍ പാസ് ചെയ്യുന്നത്?

അമ്മയുടെ മുഖത്തു ചമ്മലും എന്റെ മുഖത്തു നിസംഗഭാവവുമായിരുന്നു. ഒരു കൂസലുമില്ലാതെ ഞാന്‍ അവിടെ നിന്ന്, അമ്മയുടെ ഭാഷയില്‍ "നാലിടങ്ങഴി മൂത്രം" അങ്ങ് പാസ് ചെയ്തു. ഹല്ല പിന്നെ.

ഇപ്പോഴും ബസ് യാത്രക്ക് പോകാന്‍ ഇറങ്ങുമ്പോള്‍ അമ്മ ഓര്‍മിപ്പിക്കാറുണ്ട്‌

"നന്നായി മുള്ളിയേച്ചു ബസേല്‍ കേറണേ...."